آسکر ایوارڈ یافتہ نامور ہولی وڈ اداکار و ٹی وی میزبان ٹام ہینکس نے آسٹریلیا سے تعلق رکھنے والے اپنے ایک مداح کو کورونا برانڈ کا ٹائپ رائٹر اور ایک خط تحفے میں بھیج دیا۔

ہولی وڈ اداکار نے اپنے اس 8 سالہ مداح کو یہ تحفہ اس لیے بھیجا کیوں کہ اس نوجوان نے اپنے ایک خط میں اداکار کو بتایا تھا کہ اس کا نام کورونا ہے اور اس نام کی وجہ سے اسے اسکول میں تنگ کیا جاتا ہے۔

خبر رساں ادارے رائٹرز کی رپورٹ کے مطابق 8 سالہ آسٹریلوی نوجوان ’کورونا ڈی وریز‘ نے اداکار اور ان کی اہلیہ ریٹا ولسن کے نام یہ خط اس وقت تحریر کیا جب وہ آسٹریلیا کے شہر کوئنزلینڈ میں کورونا سے متاثر ہوئے تھے۔

اپنے خط میں بچے نے نیک تمناؤں کا اظہار کیا تھا۔

بچے نے اپنے خط میں لکھا تھا کہ ’میں نے خبروں میں سنا کہ آپ اور آپ کی اہلیہ دونوں کورونا وائرس سے متاثر ہوگئے ہیں’۔

انہوں نے مزید لکھا کہ مجھے اپنا نام بےحد پسند ہے لیکن اسکول میں مجھے کورونا وائرس بول کر پریشان کیا جارہا ہے جس کی وجہ سے میں اداس ہوں اور مجھے غصہ بھی آرہا ہے۔

اس بچے کے خط کے جواب میں ٹان ہینکس نے بھی ایک خط بھیجا جس میں انہوں نے لکھا کہ ان کا خط ریٹا اور انہیں بےحد پسند آیا۔